Ginpabakod sang jail administration ang seguridad sa pasilidad agod mapunggan ang pagpasulod kag pagbaligya sang ilegal nga droga, kag masiguro ang kaluwasan sang mga Person Deprived of Liberty ukon PDL, personnel kag mga bisita ini ang ginpahayag ni Ginpahayag ni Ret. PLCol. Barney Condes, RN, Provincial Warden sang South Cotabato Provincial Jail, sa interview sang Bombo Radyo Koronadal.
Suno kay Condes, ginapaidalom sa drug testing ang mga bag-o nga gina-commit nga PDL halin sa iban nga estasyon antes sila batonon sa Provincial Jail. Ginapatigayon man ang regular nga drug testing sa mga PDL nga yara na sa sulod sang pasilidad.
Ginpabakod man sang jail administration ang pag-inspeksyon sa mga nagabisita sa mga PDL, lakip ang mga kagamitan nga ila ginadala sa sulod kag guwa sang pasilidad. Gina-monitor man ang mga jail personnel agod malikawan ang bisan ano nga anomalya kag masiguro nga wala sang ilegal nga droga nga makalusot ukon makabaligya sa sulod sang jail.
Suno pa kay Condes, sang Hulyo kag Setyembre sini nga tuig, pito kag walo ka PDL ang na-commit sa Provincial Jail, kag ginapatuman sa tanan ang nagakaigo nga security kag drug-testing protocols.
Samtang, may yara man sang nagkalain-lain nga programa sa sulod sang pasilidad agod mahatagan ang mga PDL sang mapuslanon nga mga aktibidad kag malayo ang ila atensyon sa mga butang nga mahimo magresulta sa dugang nga paglapas.
Lakip sa mga ini ang sports, agriculture, religious activities, kag pag-eskwela paagi sa Alternative Learning System ukon ALS.
Suno kay Condes, epektibo ang mga programa bangod aktibo nga nagapartisipar ang mga PDL, kag ang iban sa sini nga mga aktibidad nagahatag man sa ila sang oportunidad nga makaginansya samtang yara sa sulod sang pasilidad.
