Nagpatuman sang mga tikang ang South Cotabato Detention and Rehabilitation Center agod maprotektahan ang mga Person Deprived of Liberty ukon PDL batok sa peligro sang sobra nga kainit nga ginaeksperyensyahan bangod sang phenomenal El Niño.
Suno kay Ret. PLCol. Barney Condes, RN, Provincial Warden sang South Cotabato Detention and Rehabilitation Center, may ginpatuman nga pamaagi ang jail administration agod malikawan nga matam-an sang init ang mga PDL, ilabi na sa pinakainit nga tion sang adlaw.
Ginpahayag ni Condes nga halin alas-11 sang aga tubtob alas-3 sang hapon, ginatugutan ang mga PDL nga maghalin anay sa ila tagsa-tagsa ka detention room kag magpahuway sa gymnasium, nga mas angay nga lugar para makalikaw sa sobra nga kainit.
Kon magapadayon pa ang mataas nga temperatura bisan lampas na alas-3 sang hapon, mahimo gihapon nga magpabilin anay ang mga PDL sa gymnasium tubtob nga magluag ang kainit antes sila makabalik sa ila tagsa-tagsa ka detention room.
Suno pa kay Condes, padayon ang pagpatuman sang mga tikang para mapabilin nga luwas kag maayo ang kahimtangan sang mga PDL, samtang ginaseguro man sang jail administration ang kalimpyo kag husto nga pagdumala sa sulod sang pasilidad.
Ginpasiguro man niya nga padayon ang paghatag sang matinud-anon kag responsable nga serbisyo para sa kaayuhan sang mga PDL kag sang publiko
