Nagaplano ang Koronadal City Police Station sang dugang kag mas estratehiko nga mga tikang agod masolusyunan ang padayon nga problema sang illegal drag racing sa syudad.
Ini ang ginpahayag ni Police LtCol. Harold Cornel, Chief of Police sang Koronadal City PNP, sa interview sang Bombo Radyo Koronadal.
Suno kay Cornel, gina-aksyonan sang kapulisan ang mga reklamo tuhoy sa illegal drag racing. Lakip sa ginapatuman nga aksyon ang pag-impound sang motorsiklo kag pag-isyu sang ticket sa mga madakpan nga nagalapas sa kasuguan.
Apang gin-amin man ni Cornel nga nagapadayon gihapon ang amo nga aktibidad. Base sa mga report nga nabaton sang kapulisan, may mga kaso gihapon sang illegal drag racing sa pila ka lugar, apang kasagaran nagakadula ukon nagapalagyo dayon ang mga nagapatigayon sini bangod sa ila kadasig.
Bangod sini, ginpahayag ni Cornel nga magapatigayon siya sang meeting kaupod ang bug-os nga kapulisan sa Koronadal agod mapag-on ang koordinasyon kag makapangita sang mas epektibo kag innovative nga pamaagi sa pag-atubang sang illegal drag racing.
Pahayag niya, kinahanglan ang mas estratehiko nga pagpatuman sang kampanya agod indi lamang madakpan ang mga nagalapas, kundi mapunggan man ang padayon nga pagbalik sang amo nga aktibidad.
