Nangayo sang bulig sa mga otoridad si Janggo De Asis, residente sang Brgy. Carpenter Hill, agod masolusyunan ang dugay na nga problema sang drag racing nga ginahimo sang mga kabataan sa dalan sang ila barangay.
Suno kay De Asis, dugay na nga nagakatabo ang drag racing sa ila lugar. Madamo na aniya ang nagkaladisgrasya, naospital, kag may mga nagkalamatay bangod sa amo nga aktibidad. Apang bisan pa sini, nagapadayon gihapon ang mga nagahimo sang drag racing.
Suno pa sa iya, indi lamang ini delikado kundi nagahatag man sang problema sa mga miyembro sang Barangay Peacekeeping Action Team (BPATS), sa mga nagabiyahe kon gab-i, kag sa mga pamilya nga nagapahuway sa ila mga panimalay.
Bisan pa may mga ginadakop na sa amo nga aktibidad, siling ni De Asis, nagapadayon gihapon ang drag racing sa lugar.
Gani, nagapanawagan siya sa mga otoridad nga mas seryosohon ang pagpatuman sang kasuguan kag aksyunan ang mga nagapasimuno sang amo nga aktibidad.
Suno kay De Asis, indi igo nga ang BPATS lamang ang magpatuman sang pagdakop, bangod bisan may mga nagakadakop, nagapadayon gihapon ang iban sa pagpatigayon sang drag racing.
