Tumong ni President Ferdinand Marcos Jr. nga mabalik sa mas maayo nga kahimtangan ang relasyon sang Pilipinas kag China kag malikawan ang pagbalik sang mga insidente nga nagapasaka sang tensyon sa tunga sang duha ka pungsod.
Suno kay Palace Press Officer Undersecretary Claire Castro, amo ini ang panguna nga mensahe sang Pangulo sa iya isa ka oras kag 20 minutos nga pulong kay Chinese Ambassador Jing Quiang sang Martes.
Apang, nagbalibad si Castro nga ibuyagyag ang detalye sang ila pag-istoryahanay bangud suno sa iya, nagkasugot ang duha ka bahin nga magpabilin ini nga confidential.
Gani, ginpahayag niya nga matawhay kag positibo ang ila diskusyon kag nagkaroon sang pagbinayloay sang mga panan-aw kag suhestyon.
May kaangtanan naman sa ginpahayag ni Ambassador Jing Quiang, ginpahayag ni Castro nga wala pa sang ginakumpirmar nga kasugtanan ang gobyerno may kaangtanan sa ginatawag nga “July 2024 arrangement” nga ginakabig nga may kaangtanan sa BRP Sierra Madre sa Ayungin Shoal.
Samtang, ginhangkat man ni Castro ang China nga ipagwa ang ginpahayag nga kasugtanan kun may yara man sini.
Dugang pa niya, padayon nga ginadiskusyunan ang ginatudlo nga “secret deal” sa tunga sang anay administrasyon kag Beijing nga may kaangtanan sa BRP Sierra Madre.
