Nag-negatibo sa ilegal nga droga si Bise Alkalde Jeryll Harold Respicio sang Reina Mercedes, Isabela, matapos magpa-drug test sa isa ka pribado nga ospital sa Quezon City.
Ginpahigayon ang paganalisar sa St. Luke’s Medical Center–Quezon City, kasunod sang panawagan ni Interior Secretary Jonvic Remulla kay Respicio nga magpa-drug test matapos ang mainit nga komprontasyon sini sa isa ka kapitan sang barangay sa sesyon sang Sangguniang Bayan.
Sa isa ka post sa Facebook, ginpamatud-an ni Respicio nga nagpa-drug test siya kag pabugal-bugal nga ginmension ang daku nga kantidad sang ginbayad sini.
“Jonvic, i-refund mo ako. Mahal gid ang drug test,” siling ni Respicio.
Nauna na nga ginpahayag ni Remulla nga si Isabela Governor Rodolfo Albano III ang nagadumala sa insidente nga ginaatubang sang bise alkalde matapos maglapta sa social media ang video sang mainit nga pagdiskusyon sini kag pila ka mga opisyal sang barangay.
Nahitabo ang insidente samtang ginaistoryahan sang mga opisyal ang mga proyekto nga ginpondohan sa bahin sang tobacco excise tax. Nag-init ang diskusyon kag gina-live stream ini, antes naglapta sa social media.
Sa isa ka interview sa media, ginpahayag ni Remulla nga iya ginrekomendar ang drug testing kay Respicio bangod sa iya ginpakita nga pamatasan sa amo nga insidente.
Sa pihak sang mga pahayag kag alegasyon batok kay Respicio, nagpagwa ang ginpatigayon nga drug test sang negatibo nga resulta para sa ilegal nga droga.
