Indi garantiya nga magnubo ang electricity rates kon ang isa ka electric cooperative pag-take-over-an sang pribado nga electric company, suno kay SOCOTECO-1 General Manager Engr. Raffee Edsel B. Epistola.
Sa interview sang Bombo Radyo Koronadal, ginpahayag ni Epistola nga kinahanglan mangin maalam ang publiko sa pagtan-aw sa panukala nga pag-take-over sang private electric companies sa mga electric cooperative, ilabi na sa aspeto sang electricity rates.
Suno sa iya, yara sa P14 tubtob P15 kada kilowatt-hour ang ginapatuman nga rates sang pila ka private electric companies. Gani, ginpunto niya nga ang current rate sang electric cooperatives dapat ikumpara gid sa rates sang mga pribadong kompanya antes magdesisyon para sa privatization.
Ginpahayag man ni Epistola nga indi kinahanglan hunahunaon nga ang pag-take-over sang private companies amo ang solusyon sa mataas nga electricity rates. Iya ginhatag bilang halimbawa ang sitwasyon sa Iloilo kag Bacolod, diin suno sa iya, wala man nagresulta sa daku nga pagnubo sang electricity rates ang pag-operate sang private electric companies.
Dugang pa niya, may ginakuha nga profit margin nga tubtob 5 porsyento ang mga pribadong electric companies, kag posible ini nga mag-reflect gihapon sa ginabayran sang mga konsumidor.
Sa pihak nga bahin, ginpahayag ni Epistola nga ang electric cooperatives pareho sang SOCOTECO-1 ang may bentaha tungod nga non-profit organizations ini. Bangod sini, mas daku ang posibilidad nga ang ginabayran sang consumers magamit para sa operasyon kag pagpauswag sang serbisyo imbes nga para sa private profit.
Gani, ginpabutyag ni Epistola nga antes suportahan ang pag-take-over sang private electric companies, dapat anay usisaon sang publiko indi lamang ang kalidad sang serbisyo kundi labi na gid ang aktwal nga electricity rates kag dugang nga charges nga mahimo nga maipasa sa mga consumers.
Para kay Epistola, indi dapat awtomatiko nga i-assume nga ang privatization amo ang solusyon sa problema sang mataas nga power rates, bangod posible nga ang consumers gihapon ang magdala sang cost sang operasyon kag profit sang pribado nga kompanya.
