Ginpanginwala sang Ignite Power ang alegasyon sang pila ka grupo nga nagasuhol ini sang kwarta sa mga pumuluyo agud magbotar pabor sa ginaproponer nga joint venture company.
Sa interview sang Bombo Radyo Koronadal kay Jonathan Cabrera, Information Officer sang Ignite Power/Primelectric, ginpahayag niya nga alegasyon lamang ini kag wala pa mapamatud-an nga may ginhatag nga kwarta ang kumpanya sa mga pumuluyo para suportahan ang joint venture.
Suno kay Cabrera, padayon ang ila ginapatigayon nga education and information drive sa mga pumuluyo agud mahatagan sila sang husto nga impormasyon parte sa kahimtangan sang SOCOTECO-II kag sa ginaproponer nga joint venture.
Ginpahayag niya nga tumong sang ila information drive nga mapahangop sa mga pumuluyo ang kahimtangan sang kooperatiba kag ang ginatan-aw nga papel sang joint venture sa pagbulig sa SOCOTECO-II nga masalbar ang mga ginatubang sini nga problema kag makapadayon sa paghatag sang serbisyo sa katawhan.
