Nagpanawagan si Presiding Officer Francis “Chiz” Escudero sang pagpugong, respeto kag pagkamatarong sa tanan nga nagadalahig sa impeachment trial ni Vice President Sara Duterte, kasunod sang pagtaas sang tensyon kag emosyon sa mga proceedings.
Sa iya pahayag antes magsugod ang hearing, ginpahayag ni Escudero nga nahangpan niya nga naganubo na ang pasensya sang iban kag nagataas ang emosyon samtang nagapadayon ang hearing.
Apang ginpabug-atan niya nga indi dapat kalimtan sang tanan ang ila responsibilidad nga buligan ang Impeachment Court nga masolbar ang kaso sa husto, patas kag malinong nga paagi.
Ginpahanumdom man ni Escudero ang mga senator-judges nga indi dapat madalahig ukon maapektuhan sang mga pahayag nga nagahalin sa sulod ukon guwa sang impeachment trial.
Suno sa iya, ang paglitiga indi dapat mangin parte sang personal nga interes, kundi dapat magpokus sa pagpanabat sa mga dapat manabat.
Ginhatagan man niya sang pahinumdom ang mga abogado nga magpadayon sa pagpakita sang respeto kag pagkamatinahuron sa isa kag isa, suno sa Code of Professional Responsibility and Accountability.
Suno kay Escudero, mahimo mangin mabaskog ang mga argumento kag pagpakamalaot sa panahon sang hearing, apang indi ini dapat magdul-ong sa personal nga pag-atake ukon paglapastangan sa dignidad sang iban.
Sa katapusan, ginpabug-atan niya nga sa pagtapos sang impeachment trial, ang dapat magdaog amo ang layi kag indi ang kaakig ukon personal nga emosyon.
