Ginmando ni Pangulong Ferdinand Marcos Jr. sa Department of Health ukon DOH nga pabakuron pa ang information campaign batok sa posible nga epekto sa kahimsog sang ginatawag nga “very strong El Niño.”
Suno kay DOH Secretary Edwin Mercado, gusto sang Pangulo nga indi lamang magdepende ang DOH sa mga posters kag online platforms sa paghatag sang impormasyon sa publiko.
Sa baylo, gin-engganyo sang Pangulo ang DOH nga magkadto mismo sa mga barangay kag komunidad agud ipaathag sa mga residente kon paano malikawan ang mga balatian kag iban pa nga health risks bangod sang sobra nga kainit sang panahon.
Bangod sini, ginpaabot na man ni Mercado sa mga regional offices sang DOH ang direktiba agud maisagawa ang community-based information campaign, lakip ang pagbabalay-balay.
Tuyo sang tikang nga mapalapit pa sa mga komunidad ang health advisories kag masiguro nga nahibaluan sang publiko ang mga dapat himuon agud maprotektahan ang ila kaugalingon batok sa epekto sang sobra nga kainit.
