Ginkabig sang House prosecution nga “very alarming” ang ₱319.33 milyon nga remittances halin China kag Hong Kong nga nabaton sang Cale88 Foods Corporation — isa ka kumpanya nga konektado kay Manases “Mans” Carpio, bana ni Vice President Sara Duterte.
Suno sa PROSECUTION PANEL, mas dapat nga kabalak-an ini bangud ang pila sa mga kumpanya nga nagpadala sang kwarta sa Cale88 may kaangtanan sa Chinese state-owned enterprises.
Pahayag ni House Deputy Speaker Paolo Ortega, kinahanglan pa sang mas madalom nga imbestigasyon angut sa sini, samtang suno naman kay House impeachment team spokesperson Ace Barbers, dapat matumod kun may nalapas nga layi.
Ginklaro naman ni Barbers nga indi otomatik nga ilegal ang pagbaton sang pondo halin sa China, kag kinahanglan pa mahibaluan kun diin ini naghalin, para sa ano ang bayad, kag sin-o ang direktang nakabenepisyo.
Samtang, suno sa ANTI-MONEY LAUNDERING COUNCIL ukon AMLC, kinahanglan pa nila repasuhon ang impormasyon nga may kaangtanan sa amo nga mga transaksyon.
