KORONADAL CITY – Nagpadala sang sulat si Sultan Kudarat Governor Datu Pax Ali Mangudadatu kay South Cotabato Governor Reynaldo Tamayo Jr. bilang Chairman sang Regional Peace and Order Council ukon RPOC 12 nga magpatigayon sang special meeting angot sa aligasyon nga nagikan sa kapitolyo sang ila probinsiya ang nangin pagpamahog sang naglabay nga Tnalak festival.
Kasunod ini sang nangin pahayag ni Governor Tamayo nga ang suno pa bomb threats sang nagligad nga weeklong celebration sang Tnalak Festival ang na-trace nga nagikan sa Provincial capitol compound sang Sultan Kudarat.
Suno kay Governor Mangudadatu, nalamita sa isyu ang bug-os nga probinsiya sa ginpahayag ni Gov Tamayo gani luyag sini nga athagon ang tanan.
Kaundan sang sulat ni Gov Mangudadatu nga ginahimo sang iya pamunuan nga mapabilin ang kalinong kag katawhayan sa ila probinsiya gani unfair suno pa nga madalahig sa anuman nga isyu sang bomb threat.
Gin-insister pa ni Mangudadatu nga sa idalom sang iya nga pagpamuno ginatinguhaan sini nga maimprobar ang delivery sang health services kag makapangabuhi sang malinong ang mga taga Sultan Kudarat.
Gani bangud sa natabo, naapektuhan ang imahen sang Sultan Kudarat gani ginahingyo sini ang isa ka special meeting agud maistoryaha ini sang Regional Peace and Order Council ukon RPOC meeting.
Nahibaluan nga nagsabat naman suno pa si Governor Tamayo sa hingyo ni Governor Mangudadatu kun diin natalana ini nga pagaistoryahan sa palaabuton nga Agosto.
