Ginadumdum sa karon ang ika-22 nga anibersaryo sang 9/11 attack sa World Trade Center sa Pentagon kag ang pag-crash sang United Airlines Flight 93.
Sa interbyu sang Bombo Radyo Koronadal kay Rufino Pinoy Gonzales, Bombo International Correspondent to New York, ginpahayag sini nga lab-as pa gihapon sa iya huna-huna ang nahitabo nga pagpang-atake bangud isa siya ka Journalist.
Suno sa iya, 22 na ka tuig ang naligad apang indi niya sa gihapon malimtan ang natabo bangud madamo sang mga Pilipino ang napatay.
Ginsaysay sini nga yara siya sa New York sang tion nga siya ang nagdul-ong sa iya nga bata sa eskwelahan kag pag-puli niya siya ang nagtan-aw sang TV.
Dumduman niya pa nga banda 8:46 sang aga sang nakit-an niya sa TV nga kulukasubong isa ka pelikula lamang ang iya nga ginatan-aw, tubtub sa iya nahibaluan nga matuod tuod nga panghilitabo.
Sang mga tion nga yadtu, nakabaton siya sang tawag gikan sa iya nga ginatrabahuan agud i-cover ang natabo apang ginsugat niya anay ang iya nga bata sa Kindergarten. Ginpaklaro pa ni Gonzales nga kung wala niya ginsugat ang iya nga bata sa eskwelahan siguro lakip siya sa mga Pinoy nga napatay.
Bilang isa ka Journalist plano pa niya tani magpadulong sa lugar agud magkuha sang laragway. Gindugang pa sini nga indi niya malimtan ang iya nga nasaksihan nga pagkaguba sang bug-os nga World Trade Center nga kulukasubong ginahabuyan sang nuclear bomb.
Nahibaluan man nga ang mga nauna nga nagresponde nga mga bumbero kag mga kapulisan ang nalakip man sa mga napatay.
