Gin-arestar sang mga otoridad sa Australia ang tatlo ka mga babayi nga may koneksyon sa gina-alegar nga Islamic State matapos sila magbalik sa pungsod halin sa pila ka tuig nga pagkapriso sa Syria.
Duha sa mga babyi ang gin-arestar sa pag-abot sa Melbourne, samtang ang isa naman gin-arestar sa Sydney.
Suno sa mga report, ang grupo nag-estar sang malawig nga panahon sa al-Roj camp sa Syria halin pa sang 2019 matapos mabungkag ang self-proclaimed Islamic State caliphate.
Suno sa pulisya, posible nga mag-atubang ang mga babayi sang mga kaso may kaangtanan sa terorismo kag crimes against humanity, lakip na ang pagsulod ukon pagpabilin sa mga lugar nga kontrolado sang IS.
Sa pihak nga bahin, ginpahayag sang gobyerno sang Australia nga dugay na nila ginpreparar ang posible nga pagbalik sang nasambit nga grupo kag ginpahayag nga hugot sila nga pagabantayan sang mga otoridad.
