Usap-usapan subong nga naundang na ang ginahulat-hulat nga kasal sang aktres nga si Bea Alonzo kag sang negosyante nga si Vincent Co tungod sang indi pagkasugot sa ginpahayag nga probisyon sang ila prenuptial agreement.
Suno sa report, nagka-stalemate ang duha sa prenup, nga amo ang nagin pangunahon nga rason sang pagka-antala sang ila plano nga kasal nga ginahandum nga ipahamtang sa Spain.
May pila man ka probisyon sa prenup nga ginlantaw nga indi patas sa bahin ni Co, samtang si Bea nagpadayon nga nagapilit sa iya posisyon.
Wala ginpahayag sa publiko ang eksaktong sulod sang kondisyon, suno sa isa ka source.
Ginpahayag man nga may pila ka bisita kag paryente sang duha nga naka-book na sang biyahe padulong sa Spain para sa kasal. Apang, pagkatapos sang pagbago sang plano, gin-usar na lang nila ang ila nabilin nga tiket para sa iban nga lakat.
Ngaa sa Spain pa ang kasal? Sang 2022 pa nga nagapuyo didto si Bea matapos siya makabakal sang property sa Spain. Sa una, may chismis nga sa St. Peter the Apostle Parish sa Manila ang kasal, pero nagwa nga sa Europa ini idaraos bilang private ceremony.
Naglapta pa gid ang chismis sang nakita sang pila ka malapit nga abyan kag pamilya ni Bea nga nagbiyahe padulong sa Spain.
Si Vincent Co anak sang retail magnate nga si Lucio Co kag may mataas nga posisyon sa pila ka dagko nga kumpanya pareho sang Cosco Capital, Inc. kag Puregold Price Club, Inc.
Si Bea padayon nga aktibo sa showbiz kag sa iya negosyo.
Sa karon, wala pa sang opisyal nga pahayag halin sa kampo nila Bea kag Co parte sa ginahambal nga pagkansela sang ila kasal.
Padayon man nga nagapangayo sang komento ang Bombo Radyo sa ila, pero wala pa sang sabat.
