Nagwa subong sa Senado ang isa ka resolusyon nga nagapangabay kay Senador Ronald “Bato” dela Rosa nga boluntaryo nga magsurender sa mga awtoridad kag magpasakop sa legal nga proseso may kaangtanan sa warrant of arrest nga ginpagwa sang International Criminal Court.
Ang Senate Resolution No. 395 ginpasa nila Senador Francis “Kiko” Pangilinan, Vicente “Tito” Sotto III, Panfilo Lacson, Risa Hontiveros kag Bam Aquino samtang yara si dela Rosa sa Senado sa idalom sang “protective custody.”
Suno sa resolusyon, bisan may mga pribilehiyo kag gahum ang Senado sa idalom sang Konstitusyon, wala ini nagakahulugan nga mahimo ini nga mangin santuwaryo ukon panalipod kontra sa pagdakop sang isa ka senador nga may ginapa-atubang nga kaso.
Ginpat-od man sang mga senador nga ang immunity nga ginahatag sang Konstitusyon sa mga senador limitado lamang sa mga kaso nga may silot nga indi magsobra sa anum ka tuig nga pagkabilanggo samtang nagasesyon ang Kongreso.
Dugang pa nila, wala sang probisyon sa Konstitusyon ukon Senate Rules nga nagahatag sang awtoridad sa Senado nga maghatag sang “protective custody” ukon immunity batok sa legal nga pagdakop ukon surrender process.
Ginpaathag man sa resolusyon nga sa mga nagligad nga kaso nga naglakip kanday Juan Ponce Enrile, Leila de Lima kag Antonio Trillanes IV, ginrespeto sang Senado ang judicial process kag wala naghatag sang espesyal nga proteksyon.
Tuyo sang resolusyon nga ipahanumdom nga wala sang constitutional ukon statutory authority ang Senado para magpanalipod kontra sa lawful arrest ukon judicial proceedings.
