Ginkondena sang grupong Tindig Pilipinas kag iban pa nga kaalyado nga organisasyon ang ginahimo sang pila ka senador nga kaalyado sang mga Duterte, nga naga-protektar kay Vice President Sara Duterte batok sa impeachment trial kag kay Senador Ronald “Bato” dela Rosa batok sa pananagutan matapos magwa ang warrant of arrest halin sa International Criminal Court (ICC) batok sa iya.
Sa isa ka press conference, ginpahayag ni Atty. Dino de Leon nga klaro ang mensahe sa likod sang pag-ilis sang liderato sa Senado samtang may importante nga constitutional process nga nagakatabo.
Suno kay De Leon, daw may pila ka tawo nga nagatinguha nga pigilan ang kamatuoran kag iligtas ang pila ka personalidad gikan sa pananagutan.
Ginkritiko man niya ang pagbutang sang Senado kay dela Rosa sa protective custody matapos ini iugnay sa kaso nga crimes against humanity bahin sa madugo nga ‘war on drugs’ sang administrasyon ni anay Presidente Rodrigo Duterte.
Giit sang abogado, indi dapat mangin “safe haven” ukon kanlungan sang mga may sala kag mga akusado sang mabug-at nga krimen ang Senado.
Ginpahinumdom man niya nga limitado lang ang immunity sang mga senador kag indi ini naga-aplikar sa mabug-at nga kaso pareho sang crimes against humanity.
Nanawagan man si Yvonne Jereza sang Magdalo kay dela Rosa nga atubangon ang kaso niya sa ICC, samtang suno kay Rafaella David sang Akbayan, indi dapat pagpugngan sang Senado ang pagserbisyo sang warrant kag ang impeachment process batok kay VP Sara.
Giit pa ni De Leon, indi dapat gamiton ang isyu sang soberanya batok sa ICC tungod kabahin ini sang international law nga ginakilala man sa Konstitusyon sang Pilipinas.
Ginkondena man ni Fr. Robert Reyes ang pila ka senador nga daw nagapugong sa impeachment kag accountability process.
Suno sa mga grupo, padayon nila nga bantayan ang mga ginahimo sang Senado kag hikayaton ang publiko nga iprotektar ang constitutional processes kag pananagutan sang mga opisyal sang gobyerno.
