Naghatag sang sabat ang Malacañang sa panawagan ni Sen. Ronald “Bato” Dela Rosa kay Pangulong Ferdinand Marcos Jr. nga protektahan siya tungod sa nakaambang arrest warrant halin sa International Criminal Court (ICC).
Suno kay Palace Press Officer Undersecretary Claire Castro, ang tanan nga nagapangayo sang proteksyon sa gobyerno hatagan sang bulig suno sa balaod, lakip na ang mga akusado pareho sang senador.
Ginpahayag ni Castro nga bisan ang mga biktima sang extrajudicial killings ukon EJK nagapangayo man sang proteksyon sa pamahalaan, kag katungdanan sang tagsa ka pumuluyo nga hatagan sang husto nga proteksyon kag due process sa idalom sang balaod.
Gintugyan man sang Palasyo nga kon maaresto si Dela Rosa, mahatag sa iya ang tanan nga katungdanan bilang akusado.
Ginpasiguro man ni Castro nga indi manghimasok si Pangulong Marcos sa bisan ano nga isyu nga sakop sang hurisdiksyon sang Senado, tungod ini yara sa gahum kag otoridad sang Senado nga magdesisyon sa mga butang nga may kaangtanan diri.
