Mga rekrut sang North Korea nga naga-linya agud magkuha sang ila Russian military uniforms kag iban pa nga mga kagamitan.
Ini ang ginlunsyar sang mga opsiyales sang Ukraine nga ginakabig ang hitabo bilang pagpakilala sang mga tropa nga ginpadala sang Pyongyang sa ila inaway sang Russia.
Ginpaggwa ini sang Ukraine’s Center for Strategic Communications and Information Security nga nagahulag sa idalom sang ila Culture and Information Ministry.
Base sa kopya sang video, ginaalegar nga makit-an ang mga soldado sang North Korea nga nagatindog sa pila agud magkuha sang mga bag, mga panapton, kag iban pa nga gamit gikan sa mga soldado sang Russia. Apang indi pa mapatud-an sang Associated Press kon matuod ini ukon indi.
Ginpahayag sang center nga ang footage naghalin sa isa ka Russian soldier apang wala sini ginsugid kon paano nakuha ang kopya kag wala man gintumod kon sa diin ang lokasyon.
Ini nagsunod matapos ginsugid sang lider sang Ukrainian military intelligence nga si Kyrylo Budanov sa local media nga may yara sang 11,000 ka mga infantrymen sang North Korea ang nagahanas sa eastern Russia.
Ginabanta man ni Bundanov nga mangin handa na sa pag-upod sa inaway ang mga ginahanas nga mga soldado sa Nobyembre kag dimagkubos 2,600 ang ipadala sa rehiyon sang Kursk sang Russia kon sa diin ang Ukraine naglunsyar sang pagsalakay sang Agosto.
Kon mapatud-an gid man ang presensya sang North Korean soldiers sa Uktrain, maga-serbe ini bilang proeba nga mas nangin mabaskog ang military ties nanday Russian President Vladimir Putin kag North Korean leader Kim Jong Un.
Sang nagligad, madumduman ang pagpirma sang duha ka bahin sang isa ka estratehiko nga kasugtanan sa pag-updanay nga nagakomiter sa pahatag sang military assistance.
