Kinuwestiyon ni Jinggoy Estrada ang umano’y mabilis na pag-usad ng mga kasong isinampa laban sa ilang senador mula sa majority bloc kasunod ng pagbabago ng liderato sa Senado.
Ayon kay Estrada, napansin umano niya ang sunod-sunod at mabilis na pagsasampa ng kaso matapos maupo si Alan Peter Cayetano bilang Senate President noong Mayo 11 kapalit ni Tito Sotto.
Bukod sa kanyang kinakaharap na plunder at graft case kaugnay ng umano’y flood control anomaly, sinabi rin niyang posibleng madamay sina Chiz Escudero, Joel Villanueva, at Rodante Marcoleta sa mga reklamong inihahanda umano laban sa majority bloc.
Isinampa ng Office of the Ombudsman sa Sandiganbayan ang kaso laban kay Estrada kaugnay ng alegasyong tumanggap siya ng P573 milyong kickback mula sa flood control projects, kung saan walang inirekomendang piyansa.
Mariing itinanggi ng senador ang mga paratang at iginiit na gagamitin niya ang lahat ng legal na hakbang upang depensahan ang sarili. Aniya, hindi umano nabigyan ng sapat na timbang ang ilang ebidensiya, kabilang ang liham mula sa Senate LBRMO na nagsasabing wala siyang ginawang budget insertions sa 2025 national budget.
Iginiit din ni Estrada na naapektuhan umano ang kanyang karapatan sa due process dahil hindi siya nabigyan ng sapat na panahon upang suriin ang mga resolusyon ng DOJ at Ombudsman bago naisampa ang kaso.
Sa kabila ng kontrobersiya, sinabi ng senador na patuloy niyang ipaglalaban ang kanyang pangalan at haharapin ang usapin sa tamang proseso ng batas.
