Ginpahayag sang Israel nga ila napatay ang bag-o nga head sang armed wing sang Hamas sa Gaza nga si Mohammed Odeh matapos ang isa naman ka air strike sa nasambit nga lugar.
Suno kay Israeli Defense Minister Israel Katz, daku nga tikang ini kontra sa Hamas kag ginadayaw sini ang operasyon nga nakaigo sa rebelde nga lider.
Nahibaluan nga si Odeh ang nagserbe bilang isa sa mga lider sang Hamas Intelligence nga ginakabig may papel sa Oktubre 7, 2023 nga pag-atake sa Israel.
Gin-assign siya bilang bag-o nga lider sang armed wing sang grupo isa ka semana matapos mapatay man ang iya ginsundan nga si Ezzedine al-Haddad sa separado nga opensiba.
Madumduman nga ang Oktubre 7 nga pag-atake sang Hamas nagresulta sa pagkapatay sang masobra 1,200 ka katawhan sa Israel kag nangin kabangdanan sang nagapadayon nga giyera sa Gaza.
Sa pihak sini, padayon man ang tensyon sa rehiyon bangud sang sunod-sunod nga air strikes kag military operations sang Israel kontra sa Hamas.
