Nagabulig man ang Philippine National Police (PNP) sa pag-imbestigar sa pagkarumpag sang 9-storey building sa Angeles City, Pampanga.
Ini agud nga matumod ang ugat sang insidente kag ang mga posible nga paglapas sa safety kag building regulations.
Suno kay PNP chief General Jose Melencio Nartatez Jr., nagapadayon man ang mga ginahiwat nga rescue operations sa tunga sang peligroso nga kondisyon tungod sang mga indi istable nga debris kag live power lines.
Nauna na nga nag-deploy ang Police Regional Office 3 sang masobra 100 ka pulis para magbulig sa Bureau of Fire Protection (BFP), Armed Forces of the Philippines kag Angeles City Disaster Risk Reduction and Management Office sa ginahiwat nga search and retrieval operations, pagdumala sang trapiko kag paghatag sang seguridad sa lugar.
Nag-abiso naman ang PNP sa publiko nga indi magkadto sa lugar para indi makasablag sa ginahiwat nga mga operasyon.
Base sa pinakaulihi nga report, apat ka tawo na ang kumpirmado nga napatay sa pagkarumpag sang building, samtang may yara pa sang 17 ang missing sa karon. Naluwas na ang 26 gikan sa 47 ka biktima. Nauna na nga ginreport nga kadamuan sa mga biktima nga na-trap mga construction worker.
