Ginpabutyag ni House Prosecution Spokesperson Robert Ace Barbers nga indi kinahanglan nga magdeklara ang Commission on Audit (COA) nga “fake” ang mga acknowledgment receipts agud may basehan ang prosecution sa pagkuwestyon sang paggamit sang confidential funds.
Suno sa iya, ang mga ebidensya nga ginpresentar nila sa impeachment trial court nagapakita sang mga iregularidad nga nagahatag sang rason agud kuwestyunon ang kredibilidad sang mga dokumento.
Sa interview sang Bombo Radyo Koronadal, ginsabat ni Barbers ang argumento sang depensa nga wala nagpahayag ang COA nga peke ang mga acknowledgment receipts nga ginpresentar sa liquidation sang confidential funds ni Vice President Sara Duterte.
Suno kay Barbers, indi kompleto ang liquidation records nga gin-submit sang Office of the Vice President (OVP) kag Department of Education (DepEd).
Ginmentionar man niya nga may mga acknowledgment receipts nga nagapakita sang mga transaksyon nga suno sa prosecution wala nagakaigo sa ginpahayag nga paggamit sang confidential funds.
Dugang pa niya, may mga ngalan nga nakabutang sa pila ka acknowledgment receipts nga wala suno pa sang nagakaigo nga rekord sa Philippine Statistics Authority (PSA), nga suno sa prosecution nagapalig-on sang ila pagduda sa kredibilidad sang mga dokumento.
Sa pihak nga bahin, ginapanindugan sang depensa nga wala sang direkta nga pahayag ang COA nga peke ang acknowledgment receipts kag wala man ini nagapahayag nga may ginkawat nga confidential funds.
