Ginpabutyag ni Norala Mayor Clemente Fedoc ang importansya sang pagdonar sang dugo sa pagsugpon sang kabuhi sang isa ka indibdiwal.
Sa interview sang Bombo Radyo Koronadal kay Mayor Fedoc, iya ginpahayag nga daku ang mabulig sang mga bloodletting drive sa komunidad, ilabi na sa pagsiguro nga may bastante nga suplay sang dugo para sa mga pasyente nga nagakinahanglan sang blood transfusion.
Dugang pa sang alkalde, paagi sa pagdonar sang dugo, indi lamang ang kabuhi sang iban ang mahimo maluwas, kundi isa man ini ka paagi sang pagpakita sang pagpalangga kag pagbuligay sa isigkatawo.
Kaangot sini, ginpabutyag ni Fedoc ang iya bug-os nga suporta sa umalabot nga Dugong Bombo 2026 sang Bombo Radyo Philippines Foundation Inc., nga natalana nga pagahiwaton sa Nobyembre 14, 2026, sa 2nd floor sang KCC Mall of Marbel.
Ginapaabot nga paagi sa amo nga aktibidad, madugangan ang suplay sang dugo kag madasig ang pagbulig sa mga tawo nga nagakinahanglan sini.
Ginapanawagan man ang publiko nga magpakigbahin sa bloodletting activity agud mangin kabahin sa pagluwas sang kabuhi kag pagbulig sa mas madamo nga pumuluyo.
