Positibo ang pagbaton sang Koronadal City TODA Federation sa pag-aprubar sang pagsaka sang plete sa mga tricycle sa syudad, bangud ginapaabot nga makahatag ini sang dugang nga bulig sa mga driver sa pag-atubang sang nagamahal nga pangabuhian.
Sa interview sang Bombo Radyo Koronadal kay Brando Cabiles, presidente sang Koronadal City TODA Federation, dako nga bulig ang pag-adjust sang pamasahe sa mga drayber nga nagaatubang sang padayon nga pagsaka sang presyo sang gasolina kag iban pa nga galastuhan sa adlaw-adlaw nga pagbiyahe.
Paathag ni Cabiles, paagi sa bag-o nga plete, may posibilidad nga madugangan ang ila kinitaan kag mabuligan sila sa pagbalanse sang ila mga galastuhan sa pagpadalagan sang tricycle.
Apang, ginapaabot man nga sundon sang mga drayber ang opisyal nga fare matrix sa pagpanukot sang pamasahe agud malikawan ang sobra nga panukot kag masiguro nga nagakabig sa mga pasahero ang ginapatuman nga regulasyon.
Ginduso man ang padayon nga koordinasyon sa tunga sang TODA Federation kag lokal nga panguluhan agud mangin hapsay ang implementasyon sang bag-o nga plete kag malikawan ang posible nga pagsinumpunganay sa tunga sang mga drayber kag pasahero.
