Naglab-ot na sa 4,381 ang naitalang napatay bangud sang Ebola outbreak sa Democratic Republic of Congo, samtang nagdangat naman sa 9,066 ang kumpirmadong kaso sang balatian, suno sa datos nga ginpaguwa sang Health Ministry sang nasambit nga pungsod sang Martes, Oktubre 13.
Ginpahayag nga ang kasamtangan nga outbreak ginhalinan sang Bundibugyo variant sang Ebola virus, nga naglapnag na sa 65 ka health zones sa pito ka probinsya sang Congo.
Samtang nagapanikasog ang mga lokal nga awtoridad nga makontrol ang paglapnag sang balatian, ginakabig nga posible nga mas mataas pa ang aktuwal nga numero sang mga kaso bangud may mga wala pa nadiskubre ukon wala nalakip sa opisyal nga estadistika.
Ang kasamtangan nga outbreak naglabaw na man sa 16 ka nagligad nga outbreak sang Ebola sa nasambit nga pungsod, nga suno sa report, may kabug-usan nga 11,000 ka napatay.
Sa karon, nagapadayon ang pagtuon sang mga eksperto sa paghimo sang bakuna kontra sa Bundibugyo variant, nga wala pa sang espesipiko nga aprubado nga bakuna ukon bulong nga makapugong sini.
