Ginalauman nga mag-atubang sa House Committee on Justice sa Miyerkules, Abril 22, 2026, ang pila ka matag-as nga opisyal sang gobyerno kag resource persons sa padayon nga pag-usisa sa impeachment complaint batok kay Vice President Sara Duterte.
Suno kay Justice Committee Chairperson Rep. Gerville Luistro, gin-imbitar sanday Ombudsman Jesus Crispin Remulla, anay Senador Antonio Trillanes IV, mga opisyal sang Anti-Money Laundering Council (AMLC), suspended Overall Deputy Ombudsman Melchor Carandang, kag isa ka opisyal sang Bureau of Internal Revenue (BIR).
Tumong sang hearing amo ang pagbusisi sa gina-alegar nga pagdako sang manggad ni VP Sara kag posible nga iregularidad sa iya Statements of Assets, Liabilities and Net Worth (SALN), nga posible mapasaka sa kaso nga “betrayal of public trust.”
Ginalauman nga magpresentar si Remulla sang mga kopya sang SALN sang Bise Presidente, samtang si Trillanes magahatag sang testimonya sa iya mga alegasyon bahin sa ginapahayag nga nakatago nga manggad ni VP Sara kag sang iya pamilya.
Pagatutokan man sang hearing ang posible nga makaduluda nga bank transactions kag tax records sang mag-asawa nga Sara Duterte kag Atty. Manases Carpio.
Suno kay Luistro, ang hearing makatumod kun may nagakaigo nga “probable cause” agud mapadayon ang impeachment case sa Kamara.
