Naghatag pasidungog si US President Donald Trump sa mga biktima sang September 11, 2001 terror attack sa ginpatigayon nga seremonya sa White House.
Gindala sa seremonya ang 21-foot nga steel beam nga may kabug-aton nga 17,000 pounds kag narekober halin sa South Tower sang World Trade Center sa New York.
Ginpabugal man sa programa ang kabayanihan ni Jeffrey Palazzo, isa ka New York City firefighter, kag ni Welles Crowther, nga nagluwas sang pila ka tawo sa tion sang pag-atake.
Pahayag ni Trump, indi malipatan sang Estados Unidos ang natabo nga terror attack nga nagpatay sang 2,977 ka tawo kag nakapilas sang linibo pa.
Madumduman nga sang Setyembre 11, 2001, 19 ka terorista ang nag-hijack sang apat ka eroplano kag gin-atake ang World Trade Center sa New York, Pentagon sa Virginia, kag isa ka lugar sa Pennsylvania.
