Nagtakop bilang Overall Champion ang banwa sang Surallah sa Paragames category sang nagapadayon nga South Cotabato Provincial Athletic Association ukon SCPAA Meet 2026.
Pormal nga ginbuksan ang nasambit nga kompetisyon sang Setyembre 9, 2026 sa Norala Central Elementary School sa Norala, South Cotabato, nga gintambungan sang mga kabataan nga atleta halin sa nagkalain-lain nga banwa sang probinsya.
Sa interview sang Bombo Radyo Koronadal kay Coach Alvin Larida, Paragames Credentials Committee, ginpahayag niya nga madinalag-on ang opening program bangud sa maayo nga pagbinuligay kag koordinasyon sang mga natungdan nga ahensya kag komitiba.
Suno kay Larida, isa sa mga kabudlayan nga ginatubang sang mga atleta amo ang pag-adjust sa ila training kag pagpreparar para sa kompetisyon, bangod kabahin ini sang proseso sa pagpili kag paghanas sang mga atleta nga posible magrepresentar sa South Cotabato sa palaabuton nga Palarong Pambansa.
Sa pihak nga bahin, ginpabutyag pa niya nga importante ang padayon nga suporta kag paghanas sa mga atleta agud mapabaskog ang ila performance kag mangin handa sa mas mataas nga lebel sang kompetisyon.
