Ginkondena sang Group of Seven (G7) nations ang “iligal, nga aksyon” sang China sa Indo-Pacific, partikular ang pangha-harass sa mga barko sang Pilipinas sa West Philippine Sea (WPS).
Sa isa ka pahayag nga ginpagwa sang Embahada sang Estados Unidos sa Manila, ginpahayag nga ang G7 seryoso nga makabalaka sa pagsaka sang mga insidente sa maga tikang sang mga Chinese Coast Guard (CCG) kag ang paggamit nila sang water cannons batok sa mga salakyan pandagat sang Pilipinas.
Sa ila pagsinapol sa Charlevoix, Quebec, Canada, halin Marso 12-14, ginbatikos sang mga foreign ministers sang G7 ang mga tikang sang China nga nagapugong sa kalayaan sa pandagat kag paglupad nga ila ginapahayag nga paglapas sa international law.
Nagpromisa ang grupo nga magabuliganay agud palig-onon ang seguridad sa Indo-Pacific.
Ang G7 ginabug-os sang mga nagapanguna nga pungsod kaangay sang Canada, France, United States, Germany, Italy, Japan, kag United Kingdom.
