Ginduso ni Koronadal City Councilor Edwin Abris ang pagdugang sang traffic enforcers sa syudad agud mapabakod ang pagmonitor sa mga colorum ukon wala sang prangkisa nga mga traysikol.
Sa interview sang Bombo Radyo Koronadal, ginpahayag ni Abris nga isa sa mga balakid sa epektibo nga pagpatuman sang regulasyon amo ang limitado nga manpower sang City Traffic Management Division.
Suno sa iya, ang mga traysikol nga may balido nga franchise kag nagasunod sa gintalana nga pamasahe lamang ang dapat makapick-up sang mga pasahero kag makapanukot sang plete
Ginpahayag man ni Abris nga nagabulig ang pag-organisa sang 102 ka TODAs sa mas maayo nga koordinasyon kag accountability sang mga driver kag operator.
Apang ginabulubanta nga mahimo maglapaw sa 3,000 ang mga colorum nga traysikol sa syudad, kadam-an ginapahayag nga halin sa mga kasilingan nga banwa. Wala pa ini sang eksakto nga numero bangud padayon pa ang inventory.
Ginpabutyag ni Abris nga kinahanglan ang padayon kag patas nga enforcement agud maprotektahan ang mga lehitimo nga franchise holder kag masiguro ang seguridad sang mga pasahero.
