Ginpabutyag sang City Disaster Risk Reduction and Management Office (CDRRMO) sang Koronadal ang importansya sang bug-os nga pagpatuman sang master drainage plan agud maminusan ang problema sang pagbaha sa syudad.
Sa interview sang Bombo Radyo Koronadal kay City Disaster Risk Reduction and Management Officer Cyrus Urbano, iya ginpahayag nga ginakabig nga catch basin sang tubig-ulan ang Koronadal, gani masami nga nagabaha ang pila ka lugar, ilabi na ang mga manubo nga bahin sang syudad.
Suno kay Urbano, ang tubig nga nagahalin sa mga kabukiran nga nagapalibot sa Koronadal nagadugang sa kadamuon sang tubig nga nagailig pakadto sa syudad.
Bangud sini, dako nga bulig ang pagpatuman sang master drainage plan nga magatuytoy sang tubig pakadto sa Marbel River sa baylo nga sa Blok Creek, agud mangin mas husto kag epektibo ang pag-agos sang tubig-ulan.
Samtang, ginpanawagan ni Urbano sa mga residente nga nagaestar sa flood-prone areas nga magbakwit gilayon kun magbaskog ang ulan kag indi na hulaton nga magsaka ang tubig antes magkadto sa mas luwas nga lugar, agud malikawan ang posible nga peligro sa ila kabuhi.
