Paano kun puwede na mangin parat ang imo sud-an apisar wala ka nagbutang sang asin?
Daw indi matuod, pero posible ini sa Japan paagi sa isa ka battery-operated nga kutsara nga ginadisenyo agud mapabatyag nga mas maalat ang pagkaon bisan ginamenosan ang asin!
Ang nasambit nga kutsara, nga hinimo sa plastik kag metal, ginabaligya na sa Japan kag ginadisenyo para sa mga tawo nga nagatinguha nga magmenos sang pagkonsumo sang asin pero gusto gihapon mabatyagan ang sabor sang ila pagkaon.
Ang sobra nga pagkonsumo sang sodium ginadugtong sa mataas nga presyon sang dugo, stroke kag iban pa nga mga problema sa panglawas.
Sa Japan, ang mga adulto ginapatuhoy nga nagakonsumo sang mga 10 gramos nga asin kada adlaw, nga doble sang rekomendasyon sang World Health Organization (WHO).
Bangud sini, ginhimo ang nasambit nga kutsara agud mapabatyag nga mas maalat ang pagkaon bisan ginamenosan ang asin, agud mabuligan ang mga tawo nga makontrol ang ila pagkonsumo sini nga wala ginakompromiso ang sabor sang ila pagkaon.
Ang kutsara may kabug-aton nga 60 gramos kag ginapagana sang rechargeable lithium battery.
Sa sini nga imbensyon, indi na kinahanglan nga magdugang ka sang asin para magparat ang imo sud-an, kutsara na lang ang bahala!
Pero tandae, indi man tanan nga problema masolusyunan sang kutsara, labi na kon ang sud-an wala gid sing sabor kag ang nagluto ang may sala!
