“Indi gid kita makapresyo sang dako kay tanan man kita nagaagi sa sini nga krisis.”
Ini ang nangin pahayag ni Brando Cabiles, presidente sang Koronadal City TODA Federation, sa interview sang Bombo Radyo Koronadal, kasunod sang mga reklamo sang pila ka tricycle driver sa Syudad sang Koronadal nga kulang ang dugang nga P5 sa pamasahe kon ikumparar sa padayon nga pagsaka sang presyo sang gatong.
Suno kay Cabiles, kinahanglan man nga hangpon sang mga drayber nga indi lamang sila ang nagaatubang sang epekto sang inflation, kundi lakip man ang iban nga pumuluyo nga nagapanikasog agud masarangan ang nagataas nga galastuhan sa adlaw-adlaw.
Dugang pa niya, dapat man kabigon ang kahimtangan sang mga pasahero, ilabi na ang mga ginikanan nga may mga anak nga nag-eskwela kag limitado lamang ang income, agud indi madugangan ang ila kabug-atan sa pagpangabuhi.
Gani, ginpahanumdom ni Cabiles sa mga tricycle driver nga dapat na nila pasalamatan ang gin-aprubahan nga dugang nga P5 sa pamasahe, bangud makabulig man ini sa ila sa pag-atubang sang nagataas nga presyo sang gatong.
Samtang, ginpabutyag man niya nga kon magpadayon pa ang pagsaka sang presyo sang gasolina sa palaabuton, mahimo naman nga ipanugyan ang dugang nga pag-adjust sang pamasahe agud masolusyunan ang nagadugang nga galastuhan sang mga drayber.
