KORONADAL CITY – Naglab-ot sa anum ka mga barangay sa siyudad sang Koronadal ang ginbaha kaun diin ginatos ka pamilya man ang apektado bangud sa tubtob mag-aga nga pagbubo sang ulan.
Ini ang ginkumpirmar nin CDRRMO Cyrus Urbano sa interview sang Bombo Radyo Koronadal.
Suno kay Urbano ang mga barangay nga naapektuhan ang ginalakipan sang Barangay Conception kun diin may halos 60 ka pamilya nga temporaryo nagbakwit matapos makaeksperiensiya sang baha.
Naguba man ang tulay nga ginaagyan sang mga residente sa Purok Blaan,Brgy.Magsaysay bangud sa kabaskog nga current sang tubig-baha.
Magluwas sini, naguba man kag nag-awas ang tubig sa box culverts sa Purok Sto. Nino sa Barangay Sta. Cruz; nag-awas man ang tubig sa major canal sa atubang sa regional center sa Barangay Carpenter Hill kag mangin ang bahin sang tulay nga sakop sang Bulok creek sa Barangay Zone 3.
Nakig-coordinate man sa CDRRMO ang Barangay San Roque para sa clearing operation matapos nga madamo sang mga puno sang kahoy ang nagkalatumba bangud sa kabaskog sang hangin dala sang pagbuhos sang ulan.
Napagkit man ang pag-awas sang mga kanal sa JM Robredo Avenue, Barangay San Isidro Koronadal City malapit lamang sa Integrated Public Terminal kun diin nag-awas ang tubig baha sa dalan kag mabudlay agyan.
Dugang pa ang pag-awas man sang tubig sa kanal sa bahin sang Sitio Cogonal, Barangay Topland bangud sa mga kagingking nga nagabara sa kanal kag ginaubra nga box culvert.
Kaangot sini, ginpasiguro man ni Urbano nga wala sila nagauntat sa pagmonitor sa mga lugar nga apektado.
Sa karon, nagapadayon ang damage assessment sa pagpanalasa sang baha sa nasambit nga mga barangay sa siyudad sang Koronadal.
