Ginpaathag sang Bombo Radyo Koronadal ang nagalapta nga sala nga impormasyon sa social media may kaangtanan sa presyo sang fire trike sang Bureau of Fire Protection (BFP).
Sa interview sang Bombo Radyo Koronadal kay FO1 Adelbert Santiago, Public Information Officer sang BFP Koronadal, ginpahayag niya nga indi matuod ang impormasyon nga nagabalor sang P10 milyon ang isa ka unit sang fire trike, bangud ang aktuwal nga presyo sini sobra lamang sa P100,000.
Ginpaathag man ni Santiago nga ang nagabalor sang P10 milyon amo ang mas dako nga fire truck nga kasagaran nga ginagamit sa pagresponde sa mga insidente sang sunog.
Suno sa iya, ang fire trike nga nagalapta sa social media kabahin sang inisyatibo sang Nueva Ecija agud mapadasig ang pagresponde sa sunog sa tagsa ka barangay.
Dugang pa ni Santiago, epektibo ang fire trike sa pagresponde sa mga lugar nga makitid ang alagyan kag mabudlay sudlon sang dalagko nga fire truck.
Apang, ginpaklaro niya nga limitado lamang ang kapasidad sang fire trike sa pagdala sang tubig, gani nagakinahanglan gihapon ini sang back-up halin sa mas daku nga fire truck agud masiguro ang mas epektibo nga pag-apula sang kalayo.
