Ginpahayag ni South Cotabato Governor Reynaldo Tamayo Jr. nga wala sang isyu para sa iya ang color branding sang bisan sin-o nga politiko. Ini matapos nangin mainit nga topiko sa publiko ang pink nga bus ni Koronadal City Mayor Erlinda Araquil.
Suno sa gobernador, maayo kag wala man sang problema ang pagpamuno ni Mayor Araquil sa siyudad, bangud manami man suno pa ang performance sini.
Dugang pa ni Tamayo, indi dapat himuon nga dako nga isyu ang pink nga bus sang alkalde, bangud posible nga paborito lamang sini ang nasambit nga kolor.
Samtang, ginpanawagan sang gobernador nga dapat pa nga mapalig-on ang koneksyon kag kooperasyon sa tunga sang provincial government kag mga lokal nga gobyerno agud mas mapabaskog ang paghatag sang serbisyo publiko.
Gindugang pa niya nga dapat unahon ang serbisyo sa publiko antes ang kolor sa politika, agud mas madamo pa nga proyekto kag programa ang mahimo sang mga lider para sa kaayuhan sang ila tagsa ka komunidad.
