Dapat nga tutukan kag mas mapauswag pa sang gobyerno ang pagdumala sa inflation sa Pilipinas bangud direkta ini nga nagaapekto sa adlaw-adlaw nga pangabuhi sang mga pumuluyo.
Ini ang ginpahayag ni Atty. Rj Sustiguer – Executive Vice President sang South Cotabato Chamber of Commerce and Industry sa interview sang Bombo Radyo Koronadal, kun sa diin iya ginpaathag nga ang inflation isa ka economic concept nga nagatumod sa pagsaka sang kabug-usan nga presyo sang mga produkto kag serbisyo, nga may direkta nga epekto sa gasto sa pang-adlaw-adlaw nga pagkabuhi sang isa ka tawo.
Suno kay Sustiguer, importante nga maayo nga ma-manage ang inflation agud malikawan nga magdaku ang gasto sang mga panimalay kag indi na mangin balanse ang ila kinitaan kag mga kinahanglanon.
Dugang pa niya, isa sa mga rason nga nagadugang sa kabug-aton sang gasto sang mga pumuluyo amo ang pagsaka sang presyo sang gatong. Bangud sini, mahimo man nga magsaka ang pamasahe kag presyo sang nagkalain-lain nga panguna nga balaklon, nga nagadugang sa pinansyal nga kabudlayan sang mga panimalay.
Ginpaathag man ni Sustiguer nga kinahanglan pa nga pauswagon sang gobyerno ang mga pamaagi sa pagdumala sang inflation agud mapunggan ang sobra nga pagsaka sang presyo sang mga produkto kag serbisyo.
Samtang, ginkilala niya ang resulta sang inflation rate sang nagligad nga tuig, kun sa diin nagrehistro ang Pilipinas sang negatibo nga inflation sa annual basis.
Gani, ginapanawagan niya ang gobyerno nga ipadayon kag pauswagon ang mga tikang nga makabulig sa pagkontrol sang inflation, pareho sang mga resulta nga naangkon sang nagligad nga tuig, agud mabuligan ang mga pumuluyo sa pag-atubang sang nagapadayon nga pagsaka sang ila mga galastuhon.
