Madamo nga misconception kag diskriminasyon ang ginatubang sang Indigenous Peoples (IPs) sa syudad sang Davao, ilabi na tuhoy sa ila kultura, kinaandan nga panggawi kag identidad.
Ini ang ginpahayag ni Dr. Elizabeth Joy Serrano-Quijano, Blaan writer kag professor, sa interview sang Bombo Radyo Koronadal, kun sa diin iya ginpabutyag ang importansya sang pagpaathag kag pag-edukar sa publiko agud mas mangin husto ang paghangop sang mga tawo sa kultura kag tradisyon sang mga katutubo.
Suno kay Quijano, isa sa mga tikang nga ginapatigayon sang Indigenous Peoples communities amo ang paghatag sang edukasyon sa mga tawo, ilabi na sa husto nga pagsuksok sang indigenous nga bayo, paggamit sang nagakaigo nga indigenous music, kag pagpasundayag sang mga tradisyunal nga sayaw suno sa nagakaigo nga kultura kag tradisyon sang tagsa ka grupo.
Dugang pa niya, dapat sundon ang prinsipyo nga “Educate but don’t hate,” agud mapadaku ang kaalam kag pagtahod sang publiko sa mga Indigenous Peoples, sa baylo nga magpadayon ang diskriminasyon kag sayop nga paghulag sang ila identidad.
Apang ginpahayag man ni Quijano nga indi lamang edukasyon ang kinahanglan, kundi dapat man nga ipatuman ang nagakaigo nga mga layi kag polisiya, lakip ang penalidad batok sa mga nagahimo sang pagpang-abuso, diskriminasyon kag eksploitasyon sa mga katutubo.
Gani, ginawhag niya ang publiko nga magpakita sang pagtahod sa kultura kag tradisyon sang Indigenous Peoples paagi sa husto nga paggamit sang ila mga simbolo, panapton, musika kag sayaw, kag likawan ang mga buhat nga nagapamatuod sang diskriminasyon kag pagpang-abuso sa ila komunidad.
