Ginamit sang House Prosecution panel ang duha ka trial day nga wala nadayon bangud sa mga kalamidad agud repasuhon kag usisaon ang mga ebidensya, testimonya kag iban pa nga impormasyon batok kay Vice President Sara Duterte.
Suno kay panel adviser kag anay Rep. Ace Barbers, wala nangin balabag ang mga kalamidad sa pagtuon sang panel sa kaso kag sa pagpalig-on sang ila mga argumento.
Ginhatagan man ang mga prosecutor sang dugang nga tion para magplano sang mga masunod nga testigo kag ebidensya nga ipresentar.
Bisan duha ka trial day ang wala magamit, nagpabilin nga produktibo ang panel kag nagalaum nga mapadasig pa ang pag-uswag sang impeachment trial.
Ginalantaw man sang House ang posibilidad nga dugangan sang isa ka trial day ang ila kasamtangan nga tatlo ka adlaw kada semana, kag posible nga himuon ang Biyernes bilang dugang nga adlaw sang hearing.
Samtang, ginapadayon sang panel ang pagtalakay sa Article 1, nga may kaangtanan sa confidential funds ni VP Sara.
Suno kay Barbers, mangin mas interesante pa ang masunod nga mga hearing bangud sa kadamuon sang ebidensya nga yara sa ila.
Ginalauman man sang panel nga pagasugtan sang Impeachment Court ang ila panugyan nga ideklarar si Edward Fajarda bilang hostile witness. Suno kay Barbers, si Fajarda ang masunod kay Gina Acosta, nga lunsay mga special disbursing officer sa idalom sang duha ka talatapan ni VP Sara.
