Ginapaabot sa masunod nga semana ang bag-o nga bugso sang pagsaka sang presyo sang mga produktong petrolyo, suno sa Department of Energy (DOE) subong Huwebes, Marso 12.
Ini nagakatabo sa tunga sang padayon nga kawad-on sang kasiguruhan sa pandaigdigang merkado tungod sang pagpugong sang Iran sa pila ka parte sang Strait of Hormuz, nga isa ka kritikal nga agianan para sa isa ka-kalima sang suplay sang langis sa bug-os nga kalibutan.
Suno kay Energy Secretary Sharon Garin, posible gihapon nga magtaas ang presyo sang mga produktong petrolyo bangod wala pa gihapon nagakuminar sa subong ang presyo sang langis sa pandaigdigang merkado.
Ang ginapaabot nga oil price hike ginapasulabi gihapon sang kaguluhan sa Middle East.
Bisan pa sini, ginpahayag sang kalihim nga may igo nga suplay ang pungsod sang sulod sang 50 ka adlaw kag ang isyu lang ang presyo sang petroleum products.
Ginpangayo sang gobyerno sa mga kompanya sang langis nga padayon nga mag-order sang mga produkto bisan pa nga nagasaka ang presyo sini, kag nagaistorya man sila sa iban nga pungsod sa Asya agud masiguro nga indi maubos ang suplay sa Pilipinas.
Ginpangibabawan man ni Sec. Garin nga damo ang opsyon ukon alternatibo nga mapagkuha-an sang suplay sang langis ang pungsod.
Kasabay sini, gin-agda sang kalihim ang publiko nga magtipid sa paggamit sang kuryente agud mabalanse ang demand sang mga produktong petrolyo, kag ginpahanumdom nga indi mag-imbak sang mga produktong petrolyo sa balay bangod delikado ini.
Sa bahin sang gobyerno, ginpahamtang na ni Pangulo Ferdinand Marcos Jr. sa mga ahensya nga i-adopt ang apat ka adlaw nga pasok sa trabaho kada semana agud mapanubo ang konsumo kag gastos sa kuryente kag langis.
