KORONADAL CITY – Pagatutukan sang City Traffic Management Division ang nagluntad nga “drag racing ukon karerahay” sang motorsiklo sa atubang mismo sang City Hall diri sa siyudad sang Koronadal nga nagluntad pasado ala-una sang kaagahon sang Agosto 14,2025.
Sa interview sang Bombo Radyo Koronadal kay Joy Placer, City Traffic Management Division Head nga nakalab-ot sa ila ang nasambit nga hitabo bangud man sa post sa social media, kasubong sang video nga yara sa FB page sang Bombo Radyo.
Aminado si Placer nga indi makaya bantayan sang iya mga tinawo ang amo nga aktibidad bangud kaagahon ini kag wala sang deployment sa sini nga area.
Apang, ginpasiguro sini nga ang nasambit nga mga drag racers anng gina-operasyunan na sang Koronadal City PNP bangud indi lamang ini nagakatabo sa atubang sang City hall apang sa bisan diin nga lugar.
Sa pagkamatuod ang datos man sang mga drag racing activities diri sa siyudad kag ang pag-identify sa mga involve diri ang yara sa kapulisan.
Samtang, padayon man ang operasyon sang City Traffic Management Divison Koronadal sa pag-implentar sang national nga laye nga “No Helmet, No Travel”.
Ini bangud suno kay Placer, madamo sa gihapon ini sang makit-an nga mga katawhan sang Koronadal nga naga-byahe sang ila motorsiklo apang wala sang suksok nga mga helmet.
Mapa-aga man ukon gab-i madamo ang wala nagasunod sa balaod sang Trapiko.
Amo nga padayon ang pag-implentar sang No Helmet no travel bangod suno saiya isa sa mga kabangdanan sang kamatayon sa mga vehicular accident sang motorsiklo amo ang mga wala naga-suksok sang helmet agud maprotektahan ang ulo.
Nagpanawagan man ini sa katawhan sang Koronadal nga magsunod gid sa batas trapiko bangud para man ini sa kaayuhan sang tanan.
Samtang, panawagan man sini sa mga ginikanan nga indi pag e-tolerar ang mga kabataan nga naga-entra sa drag racing ukon karerahay sang motorsiklo.
