Ginpaathag ni Vice President Sara Duterte nga magadepende pa kun magtambong siya sa impeachment trial matapos gin-mentionar sang house prosecution ang posibilidad nga ipatawag siya bilang witness.
Suno kay Duterte, wala pa siya nakabaton sang subpoena ukon opisyal nga pagpatawag halin sa Senate impeachment court.
Para sa iya, ang impeachment isa ka legal nga proseso kag ang iya mga abogado nga nagaatubang sa Senado amo ang iya pag-apil sa amo nga proseso.
Samtang, ginapreparahan pa sang kampo ni VP Sara Duterte ang depensa kun ipresentar bilang hostile witness si Davao City Mayor Sebastian “Baste” Duterte sa impeachment trial sang iya utod.
Suno sa defense lawyer nga si Justin Gular, nabaton na nila ang kopya sang subpoena para kay Baste, pero wala anay nila ginapahayag ang ila preparasyon tubtob indi nila makita ang iya testimonya kag mga dokumento nga mahimo niya ihatag.
Sang Martes, personal nga nagkadto sa Davao City ang duha ka opisyal sang Senate Office of the Sergeant-at-Arms agud ihatod ang subpoena.
Ginahanglan si Baste nga mag-atubang sa Senate impeachment court halin Setyembre 28 tubtob 30, alas-10 sang aga, bilang witness sang house prosecution.
Suno sa subpoena, kinahanglan niya maghatag sang testimonya parte sa iya nahibaluan nahanungod sa impeachment case batok kay VP Sara Duterte.
