Posibleng masuri ng Supreme Court ang bagong interpretasyon ng Senate impeachment court sa voting threshold para sa conviction, depende sa magiging petition at sa mga legal na isyung ihaharap.
Ayon kay Atty. Randy Arreola, Law Professor, maaaring magkaroon ng judicial intervention kung mapapatunayang may grave abuse of discretion o pagkilos na lampas sa hurisdiksyon ng impeachment court. Gayunman, kailangang isaalang-alang ang separation of powers at ang kapangyarihan ng Senado sa impeachment proceedings.
Nilinaw ni Arreola na hindi ibinaba ang two-thirds requirement para sa conviction. Sa halip, nagbago ang paraan ng pagtukoy sa denominator o bilang ng mga senador na pagbabasehan ng kinakailangang boto.
Noong Setyembre 23, bumoto ang Senate impeachment court ng 13-1, habang anim na senator-judges ang hindi lumahok, upang ibasura ang dating interpretasyon na awtomatikong nangangailangan ng 16 na boto para sa conviction.
Sa bagong ruling, ang denominator ay ibabatay sa mga senador na legal at factual na may kakayahang lumahok sa proceedings sa oras ng botohan. Gayunman, hindi pa nito awtomatikong itinatakda ang eksaktong bilang ng boto dahil kailangan munang matukoy kung sinu-sino ang kuwalipikadong maisama sa denominator.
Ayon kay Arreola, nakadepende sa magiging laman ng anumang petition kung magkakaroon ng pagkakataon ang Supreme Court na suriin ang naging aksyon ng Senate impeachment court.
