Nagapadayon ang kahangawa sa epekto sang masako nga pagsaka sang presyo sang petrolyo sa pungsod, matapos ginpahayag sang Department of Energy (DOE) nga posible ini magresulta sang domino effect sa presyo sang basic commodities ukon mga kinahanglanon nga produkto sang publiko.
Suno kay Noli Geroche, director sang DOE Mindanao Field Office, sa iya interbyu sa Bombo Radyo Koronadal, ang padayon nga pagsaka sang presyo sang gatung indi lang limitado sa sektor sang enerhiya kundi nagalab-ot man sa sektor sang produksyon kag distribusyon sang mga balaklon.
Ginpahayag niya nga ang paggamit sang fuel sa cost of production kag sa transportasyon sang mga goods amo ang isa sa mga mayor nga hinungdan sang pagsaka sang presyo sang mga produkto nga adlaw-adlaw ginakonsumo sang katawhan.
Bangud sini, ginalantaw nga masunod man ang pagtaas sang presyo sang bugas, pagkaon, tubig, kag iban pa nga basic needs.
Ginahingyo man sang DOE ang kooperasyon sang mga pribado nga negosyo kag sektor, nga indi biglaon ang pagsaka sang presyo sang ila mga produkto.
Samtang padayon ang monitoring sang ahensya sa presyo sang gatung kag mga baraklon.
