Personal nga nagpasalamat ang pamilya sang OFW nga napatay sa Saudi Arabia matapos nila mabaton ang pinansyal nga assistance halin sa Department of Migrant Workers (DMW) Region 12.
Sa interview sang Bombo Radyo Koronadal, ginpabutyag ni Rovelyn Sausa, utod sang napatay nga OFW nga si Mary Sausa, ang ila dako nga pagpasalamat sa Bombo Radyo kag DMW sa bulig nga ila nabaton sa tion sang ila mabudlay nga sitwasyon.
Suno kay Rovelyn, nakabaton ang ila pamilya sang P100,000 nga assistance halin sa DMW. Gamiton ini sa pagbayad sang mga utang nga ila nausar para sa pagpalubong kay Mary, pati na sa ila adlaw-adlaw nga mga panginahanglanon.
Dugang pa niya, ang nabilin nga bulig gamiton man para sa pag-eskwela kag iban pa nga panginahanglan sang duha ka kabataan nga nabilin ni Mary.
Samtang, emosyonal man nga nagpahayag sang pagpasalamat si Tatay Romulo Sausa, amay ni Mary kag Rovelyn, sa tanan nga nagbulig sa ila pamilya sa tunga sang mabudlay nga tion.
Madumduman nga antes ini, nagpalapit si Azia Sausa sa Bombo Radyo agud mangayo sang bulig nahanungod sa pinansyal nga assistance nga ginpromisa sa ila pamilya, apang nadugayan ang pag-abot sini.
Bangud sini, gilayon nga nakig-angot ang Bombo Radyo Koronadal sa DMW Region 12 matapos ang interview kay Azia agud ipabutyag ang concern sang pamilya.
Madasig naman nga ginsabat kag gin-aksyonan sang ahensya ang concern, tubtob nga na-release sa pamilya ang P100,000 nga assistance.
