Naglab-ot na sa napulo (10) ka kumpirmadong kaso sang Mpox o monkeypox sa probinsya sang South Cotabato, base sa pinakaulihi nga datos sang Integrated Provincial Health Office (IPHO) as of Mayo 22, 2025.
Ini ginkumpirmar mismo sang Integrated Provincial Health Office (IPHO) sa isa ka press conference nga gintigayon man subong nga adlaw.
Yari ang mga banwa nga nakapagkit sang kaso sa MPOX:
Banga- 1
Koronadal-1
Tantangan- 1
Tboli- 4
Surallah- 2
Lake Sebu- 1
Bse sa datos sang IPHO, yara sa 0 tubtob 49 ang age group nga nakapagkit sang nasambit nga sakit.
Ang Mpox isa ka viral infection nga pareho sang smallpox apang mas manubo ang fatality rate.
Nagapakita ini sang mga sintomas pareho sang hilanat, pananakit sang lawas, kag butlog butlog sang panit.
Ginalauman man sang health officials nga magpabilin ang publiko nga disiplinado paagi sa pagsuksok sang face mask, paglikaw sa pisikal nga kontak sa mga may sintomas, kag pagpangayo gilayon sang bulig-medikal kon may ginabatyag.
Padayon ang kampanya sang gobyerno probinsyal sa pagpahibalo kag edukasyon sa publiko parte sa Mpox kag mga tikang agud malikawan ang mas madamo nga kaso.
