Maid-id nga ginaimbestigaan sang Isulan Municipal Police Station ukon Isulan MPS ang nagkalain-lain nga anggulo sa ginreport nga mabaskog nga lupok sa Isulan National High School sa Barangay Kalawag 1, lakip na ang alegasyon nga may isa ka estudyante nga nakita ukon gin-suspetsahan nga nagatutok sang armas pangluthang.
Apang, sa interview sang Bombo Radyo Koronadal kay Police LtCol. Neil Wadingan, Chief of Police sang Isulan PNP, wala sang nakita nga ebidensya ang mga awtoridad nga nagasuporta sa amo nga alegasyon, kag wala man sang nakumpirmar nga pagpangluthang nga nagluntad sa sulod sang buluthuan.
Suno pa kay Wadingan, yara sa sulod sang eskwelahan ang nagkalain-lain nga ahensya sang gobyerno agud magbulig sa pag-secure sang lugar kag sa pag-usisa sang ginhalinan sang nabatian nga lupok.
Ginalantaw man sang mga awtoridad ang posibilidad nga ang lupok mahimo naghalin sa mga wire nga naglupok ukon naglapak, ukon bato nga posible nahulog. Base sa inisyal nga datos nga nakuha sang kapulisan, ang huni sang lupok ginapatihan nga naghalin sa bahin sang atop sang isa ka classroom, gani kinahanglan pa sang mas malawig kag husto nga imbestigasyon agud matumod ang aktwal nga ginhalinan sini.
Kaangot sini, gindayaw ni Wadingan ang preparasyon kag pagdumala sang eskwelahan sa amo nga insidente, bangud napanginobrahan ang sitwasyon kag nakapuli ang mga estudyante nga luwas kag wala sang na-report nga pilas ukon seryoso nga kadaot sa ila lawas.
Samtang, nagapadayon ang imbestigasyon sang mga awtoridad samtang ginapangabay ang publiko nga maglikaw sa pagpalapta sang mga impormasyon nga wala pa napamatud-an.
