Nagapati ang Department of the Interior and Local Government (DILG) nga yara pa sa Pilipinas ang nagapanago nga televangelist kag leader of the Kingdom of Jesus Christ (KOJC) nga si Pastor Apollo Quiboloy.
Suno kay Interior and Local Government Secretary Benhur Abalos, may yara sang posibilidad nga yara na sila sa iban nga bahin sang kalibutan, apang para sa iya, makita sini subong, nga yari lang ang pastor sa Pilipinas.
Nagpasalig man ini sa publiko nga naga-gamay ang Pilipinas para sa ila, bangud naga-operate ang mga pulis, ang militar, kag ang mga tawo.
Nagpanawaganman si Abalos kay Quiboloy nga atubangon sa korte ang mga kaso batok sa iya nga nagalakip sang child and sexual abuse kag human trafficking.
Dugang niya nga may mga pamaagi sa korte, kag may yara ini sang oportunidad nga mag-apelar agud masiguro nga ang proseso sang hustisya sa pungsod ang patas kag dapat ini sundon sang tanan.
Una naman nga may nagtanyag sang reward nga nagabalor sang P10 million para sa mga may impormasyon nga magadul-ong sa pagkadakop kay Quiboloy. Magluwas kay Quiboloy, tag-P1 million man ang ginatanyag para sa iya lima ka kaupod nga akusado.
Sang damlag lang, ang isa sa iya mga kaupod nga akusado nga si Paulene Canada ang nadakpan sa isa ka subdivision sang Davao City sang Huwebes kasunod sang pag-anunsyo sang bounty.
Ginkwestyon naman sang legal counsel ni Quiboloy nga si Atty. Ferdinand Topacio ang motibo sang mga pribado nga indibidwal nga nagtanyag sang bounty.
Bilang sabat, ginpunto ni Abalos nga si Topacio sang 2018 nagtanyag man sang padya para sa impormasyon nga magadul-ong sa pagkadakop sang pila ka mga indibidwal.
Sa baylo nga pamangkuton ang padya, nagpanawagan si Abalos kay Topacio subong man sa mga anay tigpamaba sang presidente nga sanday Harry Roque kag Salvador Panelo nga laygayan si Quiboloy nga magsungka.
Nahibaluan nga lunsay nagserbisyo sanday Roque kag Panelo sa idalum ni anay Presidente Rodrigo Duterte nga suod nga abyan ni Quiboloy.
Gin-isyu ang arrest warrants batok kay Quiboloy kag iban pa bangud sa ginaalegar paglapas sa Republic Act 7610 ukon Special Protection of Children Against Abuse, Exploitation, and Discrimination Act kag Republic Act No. 9208 ukon Qualified Human Trafficking.
Nahibaluan nga nagpanago si Quiboloy matapos nagpagwa sang arrest warrant ang Senado batok sa iya bangud sa pagpamalibad nga magtambong sa hearing sang senado.
