SOUTH COTABATO — Nagpaandam si South Cotabato Governor Reynaldo Tamayo Jr. sa mga indibidwal nga nagapalapta ukon nagapost sang mga pamahog kag makahaladlok nga sulod sa social media, kag ginpahayag nga magapadayon ang Provincial Government kag mga otoridad sa pagpatuman sang nagakaigo nga tikang batok sa mga nagalapas sa kasuguan.
Suno kay Tamayo, nakaprehistro na ang kapulisan sang mga kaso nga naglambot sa pag-aresto sang duha ka kabataan nga nagaedad sang 16 sa Lamian, Surallah, South Cotabato kag 18 anyos sang Tupi, South Cotabato.
Nasambit nga nadakpan sila matapos matukiban ang ila mga post sa social media nga may sulod nga pamahog kag nagapakita sang armas-luthang.
Bangud sini, ginpahanumdom sang gobernador ang publiko, labi na ang mga ginikanan, nga kinahanglan tutukan kag bantayan ang online nga aktibidad sang ila mga kabataan agud malikawan ang mga insidente nga mahimo magdala sang peligro ukon legal nga problema.
Nagpaandam man si Tamayo nga ang mga ginikanan nga mapamatud-an nga nagapabaya sa ila responsibilidad sa pagdumala kag pagmonitor sa ila mga kabataan mahimo man nga mag-atubang sang nagakaigo nga aksyon, depende sa resulta sang imbestigasyon kag nagkalain-lain nga probisyon sang kasuguan.
Samtang, liwat nga ginpahayag sang gobernador nga indi pagpasugtan sa South Cotabato ang mga aktibidad nga mahimo makahatag sang peligro ukon negatibo nga impluwensya sa mga kabataan, lakip na ang ginlaragway niya nga satanic ukon demonic activities.
Gin-awhag niya ang publiko nga mangin responsable sa paggamit sang social media kag likawan ang paghimo ukon pagpalapta sang mga sulod nga mahimo magpahadlok, magpahugot sang tensyon, ukon magbutang sa peligro sa seguridad sang komunidad.
